Simptomat e sulmit në zemër mund të shfaqen papritur ose të zhvillohen gradualisht, por në të dyja rastet ato janë një urgjencë mjekësore. Ky është mesazhi kryesor i hulumtimit të publikuar në revistën European Journal of Cardiovascular Nursing.
Studimi zbuloi se pacientët me fillim gradual të simptomave morën kujdes mjekësor në tetë orë, krahasuar me 2.6 orë për njerëzit që i filluan simptomat papritur. Kur simptomat nisin gradualisht një njeri ndjen një parehati që më vonë përkeqësohet. Nga ana tjetër, në rastin e incidenteve të papritura, një dhimbje e papritur dhe e fortë godet që në fillim. “Të dyja llojet janë urgjenca mjekësore dhe kërkojnë ndihmë të menjëhershme, por nuk ndodh kështu me simptomat që shfaqen gradualisht dhe nuk u kushtohet vëmendja e duhur.”, tha autorja e parë e studimit Dr. Sahereh Mirzaei.
Në analizë janë përfshirë 474 raste të pacientëve të paraqitur në urgjencën me sindromë koronare akute. Karakteristikat e simptomave dhe koha ndërmjet shfaqjes së tyre dhe transportimit në qendrën e ndihmës së parë u vlerësuan duke përdorur një pyetësor.
Në përgjithësi, koha mesatare midis simptomave dhe mbërritjes në spital ishte katër orë. Në 56% të rasteve simptomat u shfaqën papritur, ndërsa në 44% gradualisht. Si gratë, ashtu edhe burrat kërkuan ndihmë mjekësore më shpejt kur përjetonin dhimbje të forta.
“Pothuajse gjysmës së pacientëve u kishin filluar gradualisht simptomat, gjë që tregon se kjo nuk është e pazakontë. Simptomat e sindromës akute koronare nuk janë specifike dhe pacientët shpesh kanë vështirësi në njohjen e tyre. Dhimbja, shqetësimi dhe presioni në gjoks janë shenja paralajmëruese se një arterie mund të bllokohet dhe pacientët duhet të kërkojnë menjëherë kujdes mjekësor.”, shpjegon Dr. Mirzaei.
Simptomat u shkaktuan nga lodhja fizike në më shumë se gjysmën e pacientëve meshkuj (54%) filluan krejt papritur dhe më pas u diagnostikua si infarkt akut i miokardit me ngritje të segmentit ST (i njohur si STEMI). Ky është një lloj i rëndë sulmi në zemër që kërkon rivendosjen e shpejtë të rrjedhës së gjakut në arteriet e bllokuara.
Burrat me sëmundje ishemike të zemrës ose faktorë të shumëfishtë rreziku si hipertensioni, diabeti mellitus, kolesteroli i lartë ose një histori familjare e sëmundjeve të zemrës duhet të jenë në vëzhgim për çdo dhimbje ose shqetësim të tillë pas sforcimit fizik që mund të jetë themeli i një ataku kardiak."-tha Dr. Mirzaei.
Në përfundim Dr. Mirzaei deklaroi se “dhimbja ose shqetësimi në gjoks, qofshin të rënda dhe të papritura apo të lehta, nuk duhet të injorohen. Simptomat mund të përfshijnë dhimbje në qafë, shpinë, stomak dhe shpatulla dhe mund të shoqërohen me të përziera, djersitje të ftohta, dobësi, gulçim dhe frikë. Lajmëroni menjëherë një ambulancë. Sa më shpejt të merrni ndihmë mjekësore, aq më mirë do të jetë për shëndetin tuaj.”/K.C/dritare.net
