Gjykata e Lezhës ka pezulluar nga detyra 11 zyrtarë të Hipotekës së Lezhës. Sipas informacioneve, vendimi është dërguar për ekzekutim në Policinë e Lezhës.
Mësohet se janë pezulluar nga detyra Albana Gjinaj, Marinela Tuci, Orstela Bardhaj, Sebastjano Gjetja, Besjon Ivanaj, Ornela Marku, Eglantin Lleshaj, Dorina Sulaj, Xhentil Gjegji, Vitore Lleshi dhe Diljana Prenga.
Ata janë vënë nën hetim nga prokuroria e Lezhës, pasi sipas organit të akuzës, nuk kanë zbatuar një vendim gjykate në lidhje me një pronë në zonën e “Ranës së Hedhun” në Shëngjin.
Bëhet fjalë për tjetërsimin e 234,548 metër katrore tokë shtetërore ranishte, e cila ishte tjetersuar me me dokumente te fallsifikuara, për të cilën është dënuar me burg dhe ish-kryebashkiaku i Lezhës Fran Frrokaj dhe ish-zyrtarë të tjerë.
Në lidhje me këtë çështje sipas prokurorisë, gjykata ka vendosur dhe asgjësimin e praktikave për këtë pronë, por Kadastra se ka zbatuar vendimin e Gjykatës së Lezhës, ndaj dhe kanë nisur hetimet, duke sjell dhe pezullimin e 11 punonjësve.
Ndërkohë, vetë punonjësit e kanë kundërshtuar këtë vendim me arsyetimin se nuk është në praktikën e punës së tyre pasi kërkohen të tjera vendime dhe se gjykata nuk ishte shprehur që ajo duhet të ishte kthyer në pronë shtet.
