Pas katër vitesh punë, më 2019, kishin përfunduar punimet në Autostradën Prishtinë, Arbër Xhaferi. Projekti ishte përuruar në kohën kur në krye të Qeverisë ishte Ramush Haradinaj.
Së fundmi kjo autostradë u prezantua nga faqja e internetit, ‘Highway Engineering Discoveries’, me seli në New York, si model infrastrukturor.
Autostrada që e lidh Prishtinën me Shkupin, e cila më vonë është emëruar me emrin e njërit prej figurave të shquara shqiptare “Arbën Xhaferi” kishte filluar si ide në vitin 2007 dhe nënshkrimi i kontratës me konsorciumin amerikano-turk “Bechtel-Enka” ishte bërë tek më 1 korrik të vitit 2014, në kohën kur ministër i Infrastrukturës ishte Fehmi Mujota.
Një kilometër autostradë sipas një përllogaritje të thjeshtë në këtë rrugë e cila e lidh Kosovën me Maqedoninë Veriore dhe korridorin 10, ka kushtuar 10.77 milionë euro.
Karakteristikë tjetër e Autostradës “Arbën Xhaferi” është se ajo ka urën më të gjatë në rajon me një gjatësi prej 5.7 kilometra pa ndërprerje, kurse lartësia e urës gjarpërore është 83 metra../Katror.info
