Presidenti i Serbisë, Aleksandër Vuçiç përmes një video-mesazhi në Instagram ka treguar se brenda 24-orëve do të dalë me “disa dëshmi”, për vrasjen siç tha ai “brutale” të njërit nga tre terroristët e vrarë më 24 shtator në fshatin Banjskë të Zveçanit.
“Përpjekjet për të mos bërë zhurmë se si u vranë serbët nuk do të kenë sukses dhe nuk do të kalojnë, prandaj edhe po ju informoj se brenda 24-orëve do të jeni në gjendje ta dëgjoni dhe shihni”, tha ai.
Kreu i shtetit serb po ashtu ka pretenduar se posedon deklarata të dëshmitarëve që ishin në vend të ngjarjes dhe të cilët e kanë parë se si së paku njëri nga të plagosurit ishte vrarë.
“Kemi deklarata nga dëshmitarët okularë që kanë qenë në vendin e ngjarjes, se si dhe në çfarë mënyre është vrarë brutalisht së paku një person”, ka pretenduar ai.
Sipas tij, “Serbia nuk do të qetësohet” derisa e vërteta e plotë të dihet, “sepse jetët e serbëve nuk janë më pak të vlefshme se jetët e të tjerëve”.
“Ne do të vazhdojmë të investojmë në mbrojtjen e vendit tonë. Serbia do paqe. Pyetja jonë ishte pse EULEX-i nuk pranoi të merrte pjesë në atë aksion, por u vendos në sallën e operacionit”.
