Një 21-vjeçare ka ndërruar jetë në Napoli, pasi ka pësuar një arrest kardiak pas operacionit plastik.
“La Repubblica” shkruan se autopsia do të hedhë dritë mbi shkaqet e vdekjes së Alessia Neboso, estetistes së re, e cila vdiq një javë më vonë pas operacionit për zmadhimin e gjoksit.
E reja, me origjinë nga San Pietro, një lagje në periferi të Napolit, u ndie keq pas zmadhimit të gjoksit të kryer në Napoli dhe ndërroi jetë.
Një mikeshë e Alessia-s ka thënë ‘ai operacion ishte një nga ëndrrat e saj dhe shumë shpejt do të martohej me të dashurin e saj’.
“Alessia ka pasur gjithmonë kompleksin e gjoksit të vogël. Të gjithë i thamë që të mos e bënte, por ajo ishte e vendosur dhe nuk i interesonte se çfarë i thoshin të tjerët. As i dashuri i saj nuk donte që ajo të bënte operacionin, por as atë nuk e dëgjoi”, ka thënë mikesha e 21-vjeçares së ndjerë.
Ndërkohë familja ka bërë denoncim dhe kërkon që të zbulohet shkaku i vdekjes së 21-vjeçares.
