Një aksident i rëndë hekurudhor ka ndodhur mesditën e kësaj të diele në jug të Pakistanit, ku të paktën 30 persona kanë vdekur dhe mbi 100 të tjerë janë plagosur.
Mësohet se 10 vagonë të trenit kanë dalë nga binarët, pranë stacionit hekurudhor Sahara, në qytetin Nawabshah.
Pamjet e publikuara në rrjetet sociale, tregojnë dhjetëra njerëz të cilët ndodhen në vendngjarje, disa prej të cilëve kanë ngecur poshtë vagonëve të rrokullisur.,
Ndërsa autoritetet thonë se ekipet e shpëtimit kanë mbërritur në vendin ku u shënua aksidenti tragjik dhe po punojnë për nxjerrjen e të mbijetuarve, që kanë ngecur poshtë vagonëve.
Aksidentet dhe daljet e trenit nga binarët ndodhin shpesh në sistemin e vjetruar hekurudhor në Pakistan. Në qershor 2021, dy trena u përplasën mes vete afër Daharkit në Sindh, duke i vrarë të paktën 65 njerëz dhe duke i lënduar rreth 150 të tjerë.
Të paktën 75 udhëtarë u dogjën në një zjarr që e kishte kapluar trenin Tezgam në tetor 2019, derisa nga përplasja e dy trenave në Ghotkit u vranë më shumë se 100 njerëz më 2005.
