Gramoz Ali, i njohur me emrin Mozzik, përfundoi të martën në Polici, pasi dyshohet se kërcënoi dikë me armë zjarri. Gazeta “Sinjali” raporton se reperi nga Ferizaj, është intervistuar në Polici më 16 maj, pasi dyshohet se ka kërcënuar një person, po atë ditë, në lagjen Panorama, ku edhe jeton.
Sipas informacioneve të para, Mozzik e ka kanosur me armë një person, në afërsi të shtëpisë së viktimës, si pasojë e një mosmarrëveshje momentale që kanë pasur me njëri – tjetrin.
Mozzik, ka dhënë deklaratë para hetuesve lidhur me denoncimin kundër tij. Gjatë dëshmisë reperi e ka mohuar se e ka kërcënuar me armë personin në fjalë, duke shtuar se armën nuk e ka ekspozuar fare. Por për shkak të dyshimeve të ngritura, është urdhëruar sekuestrimi i armës, për të cilën Mozzik posedon leje.
Prokurori i Shtetit ka urdhëruar hetimin e rastit ndaj reperit në drejtim të dy veprave penale “Kanosje” dhe “Përdorim i armës”.
