Partia Socialiste falenderoi për mbështetjen në tri bashkitë e qarkut të Kukësit.
Drejtuesi politik i Partisë Socialiste për qarkun e Kukësit, Pandeli Majko paraqiti sot në një dalje në selinë e PS-së fituesit e bashkive në qarkun e Kukësit.
“Kënaqësi të prezantoj fituesit e PS-së, jo vetëm për qytetarët në vendin tonë por edhe për emigrantët e Kukësit dhe Tropojës, që për herë të parë në Tropojë dhe Kukës fituam me mbi 2 mijë vota”, u shpreh Majko.
Majko tha se “zhvilluam një fushatë që nxiti një opinion të tërë publik që të flasë me gjuhën e votës për kandidatët e PS-së, për të vazhduar punët për ndryshimin e Kukësit dhe të Tropojës”.
Rexhë Byberi fitues në krye të bashkisë Tropojë, u shpreh i gëzuar për votëbesimin e marrë nga qytetarët tropojanë. “Ju falënderoj për votën tuaj dhe vlerësimin që më bëtë për punët e kryera deri tani. Ju garantoj se shumë e më shumë punë punë të tjera na presin në 4 vitet në vijim”, tha ai.
Ndërsa Safet Gjici fitues në krye të bashkisë Kukës, falënderoi të gjithë banorët e Kukësit për mbështetjen e dhënë në këto zgjedhje dhe veçanërisht tha ai, mirënjohje të veçantë për votën e emigrantëve kuksianë, që erdhën dhe na mbështetën.
“Kukësin e kemi futur tashmë në rrugën e zhvillimit të pandalshëm dhe të gjitha projektet që kemi prezantuar do t’i bëjmë realitet në vitet në vijim me mbështetjen e qeverisë”, tha Gjici.
Në qarkun Kukës, bën pjesë dhe bashkia e Hasit, e cila nuk u fitua nga kandidati i PS-së.
Majko shprehu mbështetjen për votuesit e Hasit teksa tha se ne nuk mund t’i shmangim ata që na mbështetën. “Halit Mulja dhe socialistët e Hasit do të kenë dy deputetë në mbështetje të tyre dhe Hasin nuk e konsiderojmë të humbur, pasi do të na ketë nga pas. Faleminderit të gjithë atyre që na votuan dhe na besuan të ardhmen e vendit”, tha Majko.
