Presidenti i Serbisë, Aleksandar Vucic përmes një postimi në Instagram ka bërë të ditur se është takuar sot me ambasadorin e SHBA’së në Beograd, Christopher Hill, transmeton Gazeta Metro.
Ai ka thënë se me diplomatin amerikan janë pajtuar që formimi i Asociacionit të komunave me shumicë serbe në Kosovë është i një rëndësie prioritare.
“E informova ambasadorin Hill për raundin e fundit të bisedimeve në Bruksel. U pajtuam që formimi urgjent i Bashkësisë së Komunave Serbe është i një rëndësie prioritare, por edhe se duhet shumë përpjekje, punë dhe diskutime për zgjidhjen e problemeve të akumuluara në jetën e përditshme të qytetarëve në Kosovë”, ka shkruar ai.
Tutje, Vucic ka thënë se është mirënjohës për ftesën e presidentit amerikan, Joe Biden, për të marrë pjesë në Samitin e ardhshëm të Demokracisë që do të mbahet ‘online’ në mars të këtij viti.
Vlen të theksohet se Hill dje tha se Kosova dhe Serbia në takimin në Bruksel janë treguar “shumë seriozë për të ecur përpara” dhe se çështja e Asociacionit të Komunave me Shumicë Serbe duhet të zgjidhet më urgjentisht. /gazetametro.net
