Ndërsa lideri i Kosovës dhe ai i Serbisë takohen të hënën për të negociuar një marrëveshje paqeje, një artiste e re nga Prishtina ka të ngjarë të vazhdojë të marrë kërcënime për një pikturë që përshkruan liderët e të dy vendeve duke u puthur.
Piktura e Ermira Muratit, e cila është 3 metra e gjatë, shfaq kryeministrin e Kosovës Albin Kurtin dhe presidentin serb Aleksandar Vuçiq të përqafuar, duke puthur njëri-tjetrin në buzë me sy mbyllur, transmeton Klani.
“Unë e shoh marrëdhënien e tyre si një shfaqje aktrimi…dhe të dy popujt e Kosovës dhe Serbisë, ne po shohim të njëjtin shfaqje”, tha Murati për Reuters, duke paraqitur pikturën e saj, e cila tregon të dy burrat me kostume të zeza para një sfondi të ndritshëm portokalli.
“Pavarësisht se sa të thella janë marrëdhëniet kaotike mes Kosovës dhe Serbisë, mendoj se rinia jonë e do paqen më shumë se çdo gjë tjetër.
Kurti dhe Vuçiq do të takohen në Bruksel të hënën, ku pritet të miratojnë një marrëveshje të mbështetur nga Perëndimi për normalizimin e marrëdhënieve dhe përfundimin e armiqësive.
Nëse nuk arrijnë një marrëveshje, do të përballen me izolim ndërkombëtar dhe më pak ndihmë financiare nga Bashkimi Evropian dhe Shtetet e Bashkuara.
“Historia regjistron puthje nga momentet e dhimbjes dhe lamtumirës. Por historia na kujton edhe puthjet e vëllazërisë dhe madje edhe tradhtinë. A do të jetë kjo një prej tyre?”, shkruan Murati në llogaritë e saj në rrjetet sociale teksa zbuloi pikturën e saj më 17 shkurt, kur Kosova festoi 15 vjetorin e pavarësisë nga Serbia.
Mijëra në rrjetet sociale postuan komente për pikturën e Muratit, ku shumica përdorën gjuhë urrejtjeje dhe disa madje kërcënuan me vdekje.
“Ti meriton një plumb,” tha një komentues.
Murati, e lindur një vit pas përfundimit të luftës në vitin 1999, njihet për thyerjen e tabuve me punën e saj artistike.
Ajo mori kërcënime vitin e kaluar kur realizoi një pikturë të ngjashme që tregonte dy burra të veshur me kostume popullore shqiptare duke u puthur në buzë si një gjest mbështetjeje për komunitetin LGBTI në Kosovë, ku shoqëria konservatore ende heziton të pranojë homoseksualët.
Murati tha se piktura e re kishte një mesazh thjesht politik dhe se ajo ishte mësuar të merrte kërcënime.
“Kjo nuk po më pengon. Në momentin që ata reagojnë ashtu siç po bëjnë, atëherë e kuptoj që mesazhi ka shkuar në vendin e duhur. Kjo po krijon një debat”.
