Ministri turk i Punëve të Brendshme, Süleyman Soylu, ka bërë të ditur se të paktën tre persona kanë humbur jetën dhe 213 të plagosur pas dy tërmeteve të reja në provincën jugore Hatay, raporton Anadolu.
Soylu njoftoi se përpjekjet e kërkim-shpëtimit janë duke u zhvilluar në tre vende pas tërmeteve të reja në provincën jugore Hatay.
Sipas Autoritetit të Menaxhimit të Fatkeqësive dhe Emergjencave (AFAD), lëkundja me magnitudë 6.4 ka ndodhur rreth orës 20:04 sipas kohës lokale në rrethin Defne të provincës Hatay, ndërsa tjetri me magnitudë 5.8 ka ndodhur tre minuta më vonë me epiqendër në Samandag po ashtu në provincën Hatay.
Tërmetet e dy javëve më parë, megjithëse ishin me qendër në Kahramanmaras, 100 kilometra ose më shumë nga provinca Hatay, shkaktuan dëme të mëdha edhe në këtë provincë.
Më 6 shkurt, dy tërmete me magnitudë 7.7 dhe 7.6 me epiqendër në Kahramanmaras goditën edhe dhjetë provinca të tjera, respektivisht provincat Hatay, Gaziantep, Malatya, Sanliurfa, Adana, Adimayan, Diyarbakir, Kilis, Osmaniye dhe Elazig. Nga këto dy tërmete shkatërruese u prekën mbi 13 milionë njerëz.
Sipas shifrave të fundit zyrtare, të paktën 41 mijë persona humbën jetën nga tërmetet në Türkiye. Mijëra të tjerë u plagosën.
