Profesioni i policit në Austri është një punë e vështirë dhe shpesh shoqërohet me raste të rrezikshme.
Por, jo rrallë policët kthehen në heronj, shpeshherë ata shpëtojnë jetë, ofrojnë mbrojtje, ndihmë dhe e bëjnë Vjenën një nga qytet më të sigurta në botë.
Një nga “heronjtë” shqiptarë, që shërben në policinë austriake është edhe Kaltrin Murati.
Sipas tij profesioni i policit është një prej më humanëve.
“Parimi kryesor në jetën time është t’u ndihmoj njerëzve. Profesioni i policit është një nga profesionet me humane, sepse policët përballen çdo ditë me lloj-lloj vështirësish dhe rreziqesh, vetëm për të shpëtuar jetën e tjerëve apo për t’i bërë njerëzit të ndihen të sigurt në shtëpitë e tyre, në qytet apo kudo që jetojnë”, shprehet Murati.
FOTO: ALBINFO
Polici shqiptar ka lindur në Vjenë, por me prejardhje është nga Tetova. Babai i tij kishte migruar në Austri që në moshë të re.
Kaltrini shërben në Policinë e Vjenës që nga viti 2015. Gjatë karrierës si polic, ai ka fituar disa mirënjohje për punën dhe sakrificën e tij për të shpëtuar të tjerët, ndërsa në vitin 2020 ishte në garë për të fituar çmimin “Polici i vitit në Vjenë”.
“Aktualisht jam i stacionuar në “Stadtpolizieikommando” në stacionin e policisë në Stumpergasse në qarkun e 6, në Margareten, kurse shërbej në qarkun 4,5 dhe 6. Puna ime është mbikëqyrja e rendit, komunikacionit dhe lëndëve narkotike. Ndërkohë, çdo ditë e më shumë punoj që të ngritëm në nivel më të lartë dhe në funksione udhëheqëse në policinë e Vjenës”, rrëfen Murati
Ndërsa ai shprehet mjaft krenar për rrënjet e tij familjare.
“Unë jam krenar që jam shqiptar. Në përgjithësi në Austri, shumica e shqiptarëve janë mirë të integruar dhe nuk njihemi si komunitet problematik, natyrisht problemet individuale duhet edhe të trajtohen si raste individuale”, thotë Murati. Albinfo.ch
METROPOL MAGAZINE
