Nënkryetarja e PDK-së, Vlora Çitaku, ka reaguar pas “kushteve” të kryeministrit Albin Kurti për themelimin e Asociacionit të komunave me shumicë serbe.
Përmes një postimi në Facebook, Çitaku ka kritikuar deklaratën e Kurtit para deputetëve në Kuvend, duke thënë se ai nuk i ka deputetët “palë në negociata”, shkruan lajmi.net.
“Kryeministri në negociata e ka përballë Serbinë, dhe emisarët në mes. Me ta duhet të negociojë. Jo me ne. Atyre duhet thënë kushtet, e jo neve. Për PDK-në, interesi i Kosovës është gjithmonë para kundërshtive të brendshme”, ka deklaruar Çitaku.
Ajo ka thënë se për dallim nga kryeministri, PDK është konsistente për dialogun.
“Ne mbështesim një marrëveshje gjithëpërfshirëse e cila në qendër ka njohjen reciproke. Ndërkohë, për kryeministrin, ballafaqimi me arkivat e lajmeve dhe rrëfimeve që i ka ndërtuar vet, duket të jetë më i vështiri”, ka përfunduar Çitaku.
Kujtojmë se deklarata e Kurtit për Asociacionit ka nxitur reagime të shumta, duke marrë parasysh kundërshtimet e tij ndaj Asociacionit në kohën sa ishte në opozitë. /Lajmi.net/
