Gëzimi, një 70-vjeçar nga Berati ka ardhur në “Ka Një Mesazh Për Ty” për të rrëfyer ëndrrën e madhe që e ka sjellë në studion e programit “E diela shqiptare” në Tv Klan. Prej fëmijërisë, Gëzimi dëshironte të bëhej futbollist i ekipit kombëtar. Rrethanat i dhanë një formim profesional krejt tjetër në jetë, e bënë të provonte punë të ndryshme dhe ëndrra që bëri realitet ishte të martonte vajzat e tij të veshura me fustan të bardhë.
Pas realizimit të saj, ëndrra e fëmijërisë kishte mbetur në sirtar derisa një ditë, në moshën 60-vjeçare, Gëzimi vendosi të bënte ç’mundej për ta përjetuar sadopak. Ndryshe nga moshatarët e tij që kalonin kohën së bashku, ai iu përkushtua dashurisë së parë, futbollit duke bërë edhe sakrifica.
Gëzim: Bleva një top, bleva këpucë, bluze te tregu ku ka aty që shesin dhe futesha te stadiumi.
Ardit Gjebrea: Fshehurazi.
Gëzim: Kuptohet. Fshehurazi se nuk të lë kush, kushtet janë të atilla, një stadium ka Berati.
Ardit Gjebrea: Nga futeshe, nga telat?
Gëzim: Që të arrish diçka, profesor Arditi, çdo gjë është sakrificë. Pa sakrificë, pa vullnet, nuk mund të arrish dot.
Ardit Gjebrea: Po roja të kap?
Gëzim: Po, më kanë kapur, jam larguar.
Ardit Gjebrea: Çfarë kanë thënë?
Gëzim: Nuk lejohet. Dakord. Marr topin, iki.
Ardit Gjebrea: Të nesërmen prapë, kangjellat, në stadium.
Gëzim: Këtë punë bëj.
Ardit Gjebrea: Po gruaja me gocat çfarë thonë?
Gëzim: Sa për gruan dhe për gocat do ndalemi pak.
Ardit Gjebrea: Pse?
Gëzim: “Burrë plak ti vete hidhesh nga ajo”, tha. Po çfarë ke ti moj që hidhem unë? Unë nuk është se vjedh, nuk është se i bie më qafë njeriu. Vete, bëj stërvitje, largohem. Më dëbojnë, iki. Nuk bëj llafe./tvklan.al
