Të kryesuar nga eurodeputeti Lukas Mandl, një delegacion i shoqatës “Miqësia Austri – Kosovë” tash e disa ditë po qëndron për vizitë në Kosovë. Gjatë vizitës ata kanë pasur takime me krerë të lartë të shtetit të Kosovës, duke përfshirë edhe presidenten e Kosovës, Vjosa Osmani dhe kryeministrin Albin Kurti.
Me këtë rast, dje eurodeputeti Lukas Mandl në Gjilan është nderuar me çmimin Docktor Honoris Causa nga Universiteti “Kadri Zeka”, shkruan albinfo.at.
Në takim me delegacion austriak, Presidentja Osmani ka falënderuar shtetin e Austrisë për mbështetjen ndaj Kosovës në faza të ndryshme përgjatë historisë, thuhet në një njoftim nga zyra e Presidentes.
Sipas tyre, Presidentja Osmani është angazhuar për një partneritet më të fuqishëm me Austrinë, të cilën e ka konsideruar një aleate dhe mbështetëse në rrugëtimin euroatlantik të Kosovës.
U diskutua edhe për procesin e dialogut me Serbinë, teksa Presidentja Osmani potencoi obstruksionet e Serbisë në procesin e dialogut, duke e penguar dialogun dhe duke u përpjekur që nëpërmjet përdorimit të bandave kriminale në veri ta destabilizojë jo vetëm Kosovën. Në këtë frymë, Presidentja Osmani theksoi se Kosova është e përkushtuar për kontribut për paqen dhe stabilitetin e vendit dhe rajonit, në koordinim me aleatët.
Presidentja Osmani shtoi se Kosova ka nevojë për mbështetje të mëtejme nga partnerët për anëtarësim në Këshillin e Evropës dhe organizata të tjera ndërkombëtare, sepse avancimi i Kosovës në arenën ndërkombëtare sjell më shumë stabilitet e prosperitet për të gjithë qytetarët, pa dallim, njofton albinfo.at.
Më tej, në takim u diskutua edhe për mundësitë e rritjes së bashkëpunimit ndërmjet Kosovës dhe Austrisë, ndaj në këtë kontekst Presidentja Osmani përmendi potencialin ekonomik që ka Kosova, sikurse edhe mjedisin e favorshëm për investitorët e huaj.
Politika e jashtme, arsimi, shëndetësia dhe shkëmbimi tregtar u përmendën në kontekst të thellimit të bashkëpunimit të Kosovës me Austrinë.
