Ligji për Buxhetin 2023 pritet të amendamentohet javën tjetër.
Qeveria do ta përcjell atë në Kuvend bashkë me koeficientin e përcaktuar të Ligjit për Paga, i cili ka tri javë që po mbahet sekret.
Ish-ministri i Financave, Haki Shatri thotë se kjo punë është dashtë të kryhet më herët, kur në Kuvend ishte miratuar Ligji për Buxhetin.
“Nuk kanë dashtë të kryhet kur ka qenë vakti. Prapë duhhet me shku sepse në Ligj për Paga është e definuara që vlera e koeficientit caktohet çdo vit me Ligjin për buxhetin”, pohoi Shatri për “Front Online”.
Kuvendi i Kosovës kishte miratuar më 15 dhjetor 2022 në lexim të dytë buxhetin 2023 në vlerë prej 3.21 miliardë euro.
Nëse nuk do të risillej Ligji për Buxhetin për amendamentim në Kuvend, atëherë sipas Ferat Shalës së PDK-së, ligji tjetër ai i pagave do të ishte jo funksional.
“Duhet të përcaktohet koeficienti në Ligjin e Buxhetit në mënyrë që të planifikohet sa është shuma. Pra kostoja totale. Kemi një ligj të pagave të miratuar që nuk dihet sa është kostoja e tij. Në normalitet, e që kjo Qeveri nuk e ka, kjo është dashtë të kryhet më herët”, potencoi Shala për “Front Online”.
Shala tha se është hera e parë që vlera e koeficientit lihet ndaras nga Ligji për Buxhetin.
“Qeveria e ka bërë një Ligj për Pagat, që është ligj gjysmak, i cili nuk e sqaron pagën e askujt”, deklaroi Shala.
Nga AAK kanë thënë se Qeveria ka abuzuar me të drejtat e punonjësve publikë.
Deputetja e këtij subjekti Albana Bytyqi e sheh problematike mbajtjen sekret deri tash të koeficientit.
“Me të vërtet po gënjehen mjekët, mësuesit, policët, gjyqtarët, zjarrëfikësit e të gjitha kategoritë tjera, duke e mbajtur sekret koeficientin e Pagave”, tha ajo.
Tutje ajo e bëri të ditur një qëndrim partiak.
Ne si AAK presim që vlera e koeficientit të jetë 129 euro dhe çdo vlerë më të vogël mund ta dërgojmë në Gjykatë Kushtetuese”, theksoi ajo për “Front Online”.
Gjatë ditës së hënë, sindikatat e bënë të qartë për “Front Online” se nuk pranojnë koeficient që është nën vlerën e 120 eurove, duke paralajmëruar edhe veprime sindikale në rast se ndodh kjo./Front Online/
