Debati mes zyrtarëve të Kosovës dhe Serbisë për incidentin e sotëm në Leposaviq po zhvillohet edhe në Twitter. Ishte ministri i brendshëm Xhelal Sveçla që së parë shkroi se veprimi i policisë së Kosovës në këtë incident ishte i arsyeshëm, ndërsa më pas reagoi Petar Petkovic që pretendon se ky arsyetim nuk qëndron sipas tij dhe është dezinformacion, shkruan Gazeta Metro.
Drejtori i të ashtuquajturës ‘Zyrë për Kosovë e Metohi’ pranë qeverisë së Serbisë, Petar Petkovic, i është përgjigjur në Twitter ministrit të punëve të brendshme Xhelal Sveçla me pretendime se kishte kamerë në incidentin e sotëm në Bistricë të Leposaviqit, duke i kërkuar që të publikohen pamjet. Ai ka bashkëngjitur edhe fotografi nga vendi i ngjarjes, ku sipas tij edhe shihen edhe kamera.
Petkovic më tej pretendon se nga fotografitë e veturës vërehen si predha ka goditur nga pas veturën duke e paraqitur këtë si dëshmi se nuk ndodhi rasti ashtu siç ishte njoftuar nga policia. Në komunikatën e parë të kësaj zyre ishte shkruar se vetura ishte ‘zhbiruar rafali i plumbave’ ndërsa në fotografitë e bashkëngjitura nga ai nuk vërehen katër shenja në veturën e pretenduar.
“Edhe një dezinformim nga Xhelal Sveçla. Ka kamera të mbikëqyrjes aty ku ROSU ka qëlluar Miljan. Përse Xhelal Sveçla nuk i lëshon pamjet ashtu që të gjithë të shohin se çfarë ndodhi në të vërtetë? Miljan ishte qëlluar në shpinë dhe vetura ishte qëlluar në pjesën e pasme. Kjo qartë tregon se serbët po iknin nga plumbat; ata nuk po sulmonin! Ndalo falsifikimin e fakteve Xhelal Sveçla, nuk do të shpëtosh nga kjo!”
Ministri Sveçla dhe vet Policia e Kosovës kanë njoftuar se dy persona i kanë sulmuar sot me veturë patrullën duke u rrezikuar jetën dhe reaguan duke shtënë me armë zjarri. Ministri Sveçla ka njoftuar poashtu se në hetimin e nisur është përfshirë edhe Inspektorati i Policisë së Kosovës.
Policia e Kosovës ka njoftuar poashtu pasdite se dy të dyshuarit në këtë incident janë identifikuar dhe kanë dosje paraprake të veprave penale, përfshi edhe dyshimin për vrasje./gazetametro.net
