Lista Serbe ka reaguar në drejtim të deklaratës së kryeministrit të Kosovës, Albin Kurti, pasi ai sot tha se personat si Milan Radojiçiq që është nënkryetar i Listës Serbe dhe i njëjti është në listën e zezë të Thesarit amerikan duan ta destabilizojnë veriun dhe se i njëjti ka mbështetje politike të Beogradit.
Përmes një komunikate për media, Lista Serbe ka theksuar se kryeministri Kurti dëshiron që t’i “sulmojë” serbët ndërsa sipas tyre, nënkryetari Radojiçiq dëshiron që t’i “mbrojë” ata.
“Me lëvizjet e tij të njëanshme, Albin Kurti kërkon të fitojë pikë të lira politike duke ngacmuar popullin duarthatë serb dhe në këtë mënyrë është i vetmi që kërcënon drejtpërdrejt paqen në këtë rajon, i vetëdijshëm se nuk është në gjendje të përmirësojë jetën e shqiptarëve, as të përmbush asnjë premtim të vetëm që ka bërë në fushatë. Ndryshe nga Albin Kurti që me çdo kusht dëshiron kaos dhe të sulmojë serbët, nënkryetari i Listës Serbe Milan Radoiçiq, së bashku me Listën Serbe është këtu për të mbrojtur popullin serb nga Prishtina, sepse na duhet paqe në këto kohë krize”, thuhet në komunikatë.
Përpos kësaj, nga Lista Serbe u tha se qëllimet e kryeministrit Kurti janë “të liga” dhe ai e di se nënkryetarin e Listës Serbe e ka kundërshtar të planeve të tij.
“Duhet theksuar se shembujt e qëllimeve të liga të Kurtit janë të panumërta. Një seri incidentesh dhe shembujsh të dhunës institucionale që përmbyten me keqpërdorim të autoritetit, aplikim të tepruar, joproporcional të forcës brutale ndaj qytetarëve duarthatë serbë, të cilët janë pjesëtarë të njësive speciale të Kosovës si në veri, ashtu edhe në jug që kalojnë javë të tëra janë dëshmia më e mirë se Kurti dëshiron të krijojë kushte të tilla që serbët të largohen nga habitatet e tyre shekullore. Sigurisht, në rrugën drejt realizimit të planit të tij, Kurti e kupton se kundërshtari është nënkryetari Radoiçiq dhe Lista Serbe që i mbledh të gjithë serbët nën një flamur. Prandaj nuk është për t’u habitur që më të mirët prej nesh dëbohen me akuza të rreme që serbëve t’u presin kokat, kurse Kurti pushtoi veriun pa asnjë shqetësim”, thuhet tutje.
Lista Serbe u ka bërë thirrje komunitetit ndërkombëtar që të mos rrinë të heshtur dhe forca ndërkombëtare përgjegjëse për paqe dhe siguri të “parandalojnë Kurtin që të provokojnë konflikt në rajon”./Lajmi.net/
