Partia Socialdemokrate ka paralajmëruar një proteste me rastin e vizitës në Kosovë të kryetarës së Gjykatës Speciale Ekaterina Trendafilova.
Në një konferencë për media kryetari i PSD-së Dardan Molliqaj, tha se qëllimi i Speciales nuk është sjellja e drejtësisë por damkosja e Ushtrisë Çlirimtare të Kosovës.
“Gjykata Speciale ka nisur tash e 7 vite. Me një qasje një-etnike ndaj luftës në Kosovë, me shkeljen e të drejtave të njeriut për të akuzuarit, me gjyqtarë racist që shqiptarët i sheh si “kafshë që duhen zbutur”, e deri tek mungesa e simboleve shtetërore të Kosovës në një gjykatë të saj, roli i Gjykatës Speciale nuk është ai i sjelljes së drejtësisë, por i damkosjes së UÇK-së dhe luftës së saj çlirimtare”- tha Molliqaj.
Molliqaj tha se kjo protestë do të zhvillohet kurdo që do të ndodh vizita e Trendafilovas.
“Por, sido që të rrjedhin ngjarjet, dhe për kurdo që do të shtyhet vizita, protestë do të ketë. Nga qëllimi dhe mbajtja e protestës nuk heqim dorë. Ajo do të ndodh po atë ditë kur të konfirmohet vizita e znj.Trendafilova” – theksoi Molliqaj.
I pari i PSD-së shtoi se kjo gjykatë tani po mundohet që të merret me imazhin e saj.
“Kryetarja Ekaterina Trendalifova, anuloi vizitën e saj. Por cili është qëllimi apo kuptimi i takimit të një gjykate me shoqërinë civile? Tejet e çuditshme, apo jo? Gjykata Speciale tashmë as nuk po fshehet prapa drejtësisë. Ajo ka filluar të merret me imazhin e saj. Po bënë politikë “- shtoi ai.
“Tendecave që përmes këtyre takime të normalizohet përndjekja politike do t’u përgjigjemi pa hezitim. Me rezistencë” – shtoi kreu i PSD-së Dardan Molliqaj.
