Turqia ka rënë dakord për të mbështetur anëtarësimin e Suedisë dhe Finlandës në aleancën ushtarake të NATO-s. Lajmin e ka bërë të ditur Presidenti i Finlandës, Sauli Niinistö përmes një deklarate.
Niinisto bëri me dije se gjatë Samitit të NATO-s që po zhvillohet në Madrid të Spanjës, u shënua përparim në bisedimet e vendit të tij dhe Suedisë me Turqinë.
Të treja vendet nënshkruan një memorandum të përbashkët për të zgjeruar mbështetjen e tyre të plotë kundër kërcënimeve ndaj sigurisë, pas një takimi kokë më kokë mes presidentit turk Erdogan, atij finlandez Sauli Niinisto, kryeministres së Suedisë Magdalena Andersson dhe sekretarit të përgjithshëm të Aleancës, Jens Stoltenberg.
Në reagimin e tij, ky i fundit e cilësoi politikën e dyerve të hapura të NATO-s një sukses për organizatën.
“Politika e dyerve të hapura të NATO-s është një sukses. Treguam se dimë t’i zgjidhim problemet përmes negociatave dhe me hyrjen e Suedisë dhe Finlandës në Aleancë do të jemi të gjithë më të sigurt”, deklaroi Stoltenberg.
Sekretari i Përgjithshëm saktësoi se detajet e memorandumit do të firmosen së shpejti, përfshirë këtu marrëveshjen mbi ekstradimin, që do të respektojë standardet evropiane.
Ndërkohë, presidenca turke, përmes një komunikate bëri të ditur se Erdogan kishte siguruar “bashkëpunimin e plotë” të Helsinkit dhe Stokholmit lidhur me shqetësimet e Ankarasë, për strehimin e militantëve të Partisë së Punëtorëve të Kurdistanit.
Në këtë pikë, liderët e vendeve të NATO-s do t’i ftojnë zyrtarisht Suedinë dhe Finlandën gjatë samitit, lëvizje që më pas do t’i hapë rrugë ratifikimit nga të gjitha vendet anëtare.
