Shpesh herë të rinjtë e kanë të vështirë të pranojnë ndarjen nga partnerët e tyre. Ata nuk zgjedhin formë për të provuar që të kthehen sërish bashkë, e madje nuk i kursejnë as kërcënimet e veprimet e dhunshme drejt tyre, raporton Gazeta Sinjali.
E një rast i tillë ka ndodhur dy javë më parë në rrugën ‘Shaban e Sami Ukshini’ në qytetin e Gjilanit, ku një person ka ndalur veturën dhe ka tentuar ta rrëmbejë ish të dashurën e tij.
Duke parë rrezikun që i kanoset, 29-vjeçarja e ka denoncuar menjëherë rastin në Polici, ku ka bërë të ditur se teksa po tentonte të rezistonte dhe të ikte nga ish i dashuri, ajo ka pësuar lëndime trupore.
Si pasojë e lëndimeve, ajo ka pranuar tretman mjekësor.
Ndërkohë njësitet policore kanë ndërmarrë veprimet hetimore, me ç’rast dje është arritur që të arrestohet personi i dyshuar.
Ai është shoqëruar në stacion policor për intervistim dhe ndaj tij është iniciuar rasti ‘Lëndim i lehtë trupor’.
Me vendim të prokurorit të dyshuarit i është caktuar masa e ndalimit në kohëzgjatje prej 48 orësh.
