Dhjetëra të rinj nga Drenasi janë në listën pritëse të përfitueseve të bursës nga donatorët që nga muaji dhjetor i vitit të kaluar.
Gjashtë muaj pas, studentët janë ende në pritje të marrin këtë bursë, sipas ankesave të tyre të adresuara në KALLXO.com
Por në pritje, Komuna e Drenasit thotë se janë edhe ata.
Drejtori i Arsimit në Komunën e Drenasit, Muhamet Gjoka thotë për KALLXO.com se janë në kërkim të vazhdueshëm të donatorëve.
“Ashtu siç është cekur edhe ne njoftimin e publikuar, shpërndarja e bursave nga kjo listë bëhet varësisht nga sigurimi i donatoreve. Jemi në kërkim të vazhdueshëm të donatoreve në mënyrë që të përfitojnë të gjithë studentet nga kjo listë”, ka deklaruar Gjoka.
Komuna e Drenasit më 14 dhjetor 2021 ka bërë publike listën pritëse të përfituesve të bursës nga donatorët 2021-2022.
Sipas listës janë 121 të rinj përfitues. Në ndërkohë gjatë këtij viti, Komuna e Drenasit ka bërë të ditur donatorët që kanë nënshkruar marrëveshje për ndarjen e bursave.
