Konsumimi i drogës nga të rinjtë është një ndër dukuritë që po lulëzon në të gjitha qytetet, duke e dëmtuar shëndetin e tyre dhe cenuar sigurinë e qytetarëve, raporton Gazeta Sinjali.
Një rast i tillë është zbuluar edhe mbrëmë, në rrugën “Liman Fshaj” të Ferizajt, ku gjatë patrullimit Policia ka ndaluar një të ri, i cili është kapur mat duke e hedhur në tokë një qese me substancë narkotike.
Sinjali mëson se posa i riu është vërejtur duke e hedhur qesen me marihuanë në tokë, Policia ka intervenuar, duke e ndaluar të njëjtin.
Për shkak të posedimit të substancës narkotike, ai është arrestuar dhe është shoqëruar në stacionin policor në Ferizaj, ku është intervistuar nga hetuesit policorë për veprën për të cilën ngarkohet.
Burimet e Sinjalit kanë bërë të ditur se Prokurori i Shtetit ka urdhëruar që të iniciohet rast ndaj të dyshuarit dhe të dorëzohet kallëzimi penal brenda afatit ligjor.
