Haradinaj, ka kërkuar vendosje të drejtësisë për masakrën në Burgun e Dubravës, duke theksuar që edhe pse këto masakra janë mirë të dokumentuara deri në detaje, askush ende nuk e¨shte¨ gjykuar
Kryetari i Aleancës për Ardhmërinë e Kosovës(AAK), Ramush Haradinaj ka përkujtuar të rënët në Burgun e Dubravës.
Përmes një postimi në Facebook, Haradinaj, ka thënë se për disa ditë me radhë, në javën e tretë të majit, në burgun e Dubravës ndodhi një prej krimeve më makabre që pushtuesi serb bëri kundër shqiptarëve.
I pari i AAK-së, ndër të tjera ka shtuar se 22 maji 1999, gjithashtu kujtohet për dhunën e gjakatarëve, që kaploi dhe qytetin e Vushtrrisë, në tentim të zhdukjes së qenies shqiptare.
Sipas tij, edhe pse këto masakra janë mirë të dokumentuara deri në detaje, askush ende nuk e¨shte¨ gjykuar.
“Dhembja për të rënët është e madhe, e mosvendosja e drejtësisë vetëm se mban të freskëta plagët e shpirtit. Rruga deri te liria ishte e vështirë dhe me shumë sakrifica. Shteti serb, edhe më tutje refuzon të pranojë të vërtetën dhe të përgjigjet për krimet, e Kosova vazhdon betejën për të vërtetën”, ka shkruar Haradinaj.
Kryetari i AAK-së, Ramush Haradinaj
Edhe presidentja e Kosovës, Vjosa Osmani, të enjten e 19 majit, ka përkujtuar 23 vjetorin e masakrës së Burgut të Dubravës, duke theksuar se derisa ka ende dëshmitarë të mbijetuar nga ky krim, drejtësia duhet ta bëjë punën e vet duke sjellë autorët e krimit para përgjegjësisë.
Për presidenten Osmani, pllaka me emrat e personave të vrarë është dëshmi e brutalitetit serb, që vrau brenda burgut 160 të burgosur shqiptarë dhe plagosi 300 të tjerë.“Pllaka me emrat e të vrarëve e vendosur në hapësirën e Burgut të Dubravës do të jetë dëshmi e përhershme e egërsisë së regjimit gjenocidal serb, i cili mbajti padrejtësisht në burg shqiptarët, e më pas i ekzekutoi barbarisht. Ky krim makabër mbetet ende i pandëshkuar.. Lufta jonë për liri dhe shtet do të vuloset kur drejtësia të vihet në vend për të gjitha krimet që ka bërë regjimi serb”, thuhej në njoftim.
Presidentja e Kosovës, Vjosa Osmani
Ndërkaq, më 19 maj janë bërë 23 vjet që kur në Burgun e Dubravës ishte kryer një ndër masakrat më të mëdha në Kosovë nga regjimi serb.
Në pranverën e vitit 1999, kur forcat e Ushtrisë Çlirimtare të Kosovës po përballeshin me ashpërsinë e forcave serbe në çdo cep të Kosovës, Aleanca Veriatlantike (NATO), me urdhërin e presidentit të atëhershëm të Shteteve të Bashkuara të Amerikës,(ShBA), Bill Clinton, më 24 mars të vitit 1999 filloi bombardimet e para kundër caqeve ushtarake e policore serbe.
Për humbjet që pësonin në frontet e luftës dhe nga bombat e NATO-s, ushtria dhe policia serbe, si hakmarrje kishte nisur të kryejë malltretime, dhunime, vrasje e krime mbi popullatën civile dhe mbi të burgosurit shqiptarë.Në maj të vitit 1999, pushteti serb kishte organizuar një krim të planifikuar mbi të burgosurit shqiptarë në Burgun e Dubravës, i cili në atë kohë ishte burg i sigurisë së lartë.
Masakra e Dubravës është kryer nga 19 deri më 24 maj të vitit 1999.
