Ndërron jetë në spital një i dënuar me akuzën për vrasje për shkak të marrëdhënieve familjare mbetur në tentativë.
Besnik Spaho, 53 vjeç, ka ndërruar jetë ditën e sotme në spitalin psikiatrik të Shënkollit.
Sipas njoftimit të bërë, shkak për vdekjen e tij ka qenë një arrest kardiak.
Spaho ishte i dënuar me vendim të prerë nga gjykata në vitin 2015 nën akuzën e vrasjes të mbetur në tentativë. Ndërsa së fundmi ishte transferuar në spitalin psikiatrik ku edhe gjeti vdekjen.
‘Një pacient me masë mjekësore “Shtrim i përkohshëm në një spital psikiatrik” vendim i dhënë nga Gjykata e Krimeve të Rënda, Tiranë, ka humbur jetën sot në spitalin e Lezhës, pasi ka nisur të ndihet keq në ambientet e përshtatura për këta persona në IEVP Shënkoll’, citohet në njoftimin e DPB.
Sipas të dhënave, mjeku i gatshëm i IEVP ka njoftuar në orën 15.48 minuta se pacienti po ndihej keq. Në orën 16.05 ai është transportuar nga ambientet e institucionit dhe ka mbërritur në spitalin rajonal të Lezhës, ndërkohë që është shpallur i vdekur në orën 16.15. Si shkak i vdekjes dyshohet arrest kardiak.
Materialet i kaluan organeve të tjera për procedura të mëtejshme.
