Në Durrës është konfirmuar rasti i parë i Influencës Aviare i tipit H5N8, ose siç njihet ndryshe gripi i shpendëve. Lajmin e bën të ditur Ministria e Bujqësisë dhe Zhvillimit Rural ndërsa njoftohet se rasti është konfirmuar në një stabiliment në Durrës që mbarështon shpendë.
Siç njoftohet, gjurmimi i sëmundjes nga autoritetet ligjzbatuese ka nisur me një hetim të thelluar epidemiologjik, pasi Ministria e Bujqësisë ka marrë sinjalizimin e parë për ngordhje të pulave.
Analizat e njëpasnjëshme, në të gjithë vendin, marrë gjatë kësaj periudhe konfirmonin sëmundjen e laringotrakeik gjendur vetëm në dy stabilimente në Durrës.
Ndërsa vijoi gjurmimi dhe monitorimi prej sinjalizimit të parë për çdo ditë me testime, një kampion i marrë të shtunën 19 Mars 2022, analizuar nga laboratori i referencës së Institutit të Sigurisë Ushqimore dhe Veterinarisë, ka rezultuar pas analizimit me metodën molekulare të avancuar RT-PCR, me praninë e influencës aviare, H5N8.
Hetimi epidemiologjik deri më tani njoftohet se flet për rast të izoluar. Ministria e Bujqësisë njofton se është vendosur karantinimi, udhëzuar për masat e sigurisë dhe higjienës që duhet të zbatohen, janë marrë të gjitha masat për kufizimin e përhapjes së kësaj sëmundje duke përcaktuar perimetrin e zonës nga e cila ndalohet lëvizja e shpendëve, produkteve dhe nëprodukteve të tyre.
Autoritetet sugjerojnë që mishi i pulës të gatuhen në temperatura mbi 70°C dhe vezët po ashtu të jenë të mirëgatuara.
Gatimi i plotë i mishit dhe vezëve siguron pamundësinë e virusit për prani në produkte të papërpunuara që hyjnë në zinxhirin ushqimor.
Përshtatur nga abcnews.al
