Ish-presidenti ukrainas Petro Poroshenko tha se presidenti amerikan Joe Biden duhet të vizitojë Ukrainën, ndërsa është në Evropë në një samit të NATO-s në Bruksel javën e ardhshme.
“Pse miku im shumë i mirë, mik shumë i mirë i Ukrainës, Joe Biden, lideri i botës globale, i cili demonstron tani lidershipin – pse nuk vjen për të vizituar këtu javën e ardhshme si një simbol i solidaritetit tonë?”- tha Poroshenko, i veshur me një jelek ushtarak dhe i rrethuar nga ushtarë në Kiev.
Biden do të udhëtojë në Bruksel, Belgjikë, për të marrë pjesë në një samit të NATO-s më 24 mars dhe gjithashtu do t’i bashkohet një takimi të Këshillit Evropian, sipas Shtëpisë së Bardhë.
“Ky do të ishte një hap jashtëzakonisht i drejtë për demonstrim, e gjithë bota është bashkë me ne kundër Rusisë”, shtoi Poroshenko.
Sipas sekretarit të shtypit të Shtëpisë së Bardhë Jen Psaki të martën, Biden do të “diskutojë përpjekjet e vazhdueshme për parandalimin dhe mbrojtjen”, gjatë samitit të NATO-s dhe do të riafirmojë angazhimin e SHBA ndaj aleatëve të saj në NATO.
“Ai do të bashkohet gjithashtu në një samit të planifikuar të Këshillit Evropian për të diskutuar shqetësimet tona të përbashkëta për Ukrainën, duke përfshirë përpjekjet transatlantike për të imponuar kosto ekonomike ndaj Rusisë, për të ofruar mbështetje humanitare për ata që janë prekur nga dhuna dhe për të adresuar sfidat e tjera që lidhen me konfliktin,” tha ajo.
Poroshenko tha gjithashtu se presidenti rus Vladimir Putin është një “maniak i çmendur” dhe tha se ukrainasit kanë “unitet antiplumb”, shkruajnë mediat e huaja.
Ai bëri thirrje për rritjen e sanksioneve kundër Rusisë. “Ne duhet të japim hapa shtesë për të rritur sanksionet dhe për të rritur furnizimin me armë në Ukrainë për ta bërë Putinin [të kthehet] në Rusi.
Ne nuk po luftojmë vetëm për tokën ukrainase. Ne po luftojmë për sigurinë evropiane, lirinë dhe demokracinë dhe për sigurinë globale. Dhe për ju gjithashtu, për Shtetet e Bashkuara,” tha Poroshenko.
