Deputeti i Partisë Demokratike të Kosovës, Bekim Haxhiu e ka dërguar në Kuvend propozimin për tërheqjen e 30 përqindeshit nga Trusti Pensional.
Haxhiu ka thënë për Demokracia.com se propozimi është dërguar me 9 mars, ndërsa pritet të dërgohet për votim.
“Propozimin e kemi dërguar me 9 mars. Tash janë disa procedura për ndryshimin e projektligjit për Trustin, ku u mundësohet qytetarëve tërheqja e 20 deri 30 për qind e mjeteve të tyre. Pastaj pritet të dërgohet për votim në seancë”, ka thënë Haxhiu për Demokracia.com.
Kundër tërheqjeve të këtyre mjeteve janë deklaruar Lidhja Demokratike e Kosovës si dhe Lëvizja Vetëvendosje, raporton Demokracia.com.
Ndërsa pro tërhejes së mjeteve nga Trusit janë shprehur edhe qytetarët e vendit.
Ndërkohë, me Ligjin për Rimëkëmbje Ekonomike, të nxjerrë në dhjetor 2020 nga Qeveria e Avdullah Hotit, qytetarëve iu ishte mundësua të tërheqin 10 për qind të kursimeve nga Trusti. Për katër muaj sa zgjati aplikimi u tërhoqën mbi 197 milionë euro.
Ndryshe, vlera e investimeve të Fondit të Kursimeve Pensionale të Kosovës, sipas zyrtarëve të këtij institucioni, ka shënuar humbje rreth 90 milionë euro.
Humbjet kanë ardhur si pasojë e krizës në tregjet ndërkombëtare të shkaktuar nga ndërhyrja ushtarake e Rusisë në Ukrainë.
Nga Fondi i Kursimeve Pensionale, prej mbi 2.3 miliardë euro, 78 për qind e mjeteve janë të investuara në tregjet financiare ndërkombëtare dhe rreth 22 për qind në Kosovë.
Fondi prej mbi 2.3 miliardë eurosh u takon mbi 700 mijë kontribut-paguesve të Kosovës.
