Mbrëmë në rrugën “George Bush” të Prishtinës Ismail Ismaili dyshohet se e ka plagosur me dy plumba taksistin tjetër. Ndaj të dyshuarit Prokuroria në Prishtinë ka kërkuar masën e paraburgimit.
Kështu ka njoftuar zëdhënësja e Prokurorisë Themelore të Prishtinës, Laureta Ulaj.
Ulaj i tha Sinjalit se i dyshuari ngarkohet me veprat “Vrasje në tentativë” dhe “Mbajtja në pronësi, kontroll, apo posedim të paautorizuar të armëve”.
“Ju njoftojmë se me urdhër të prokurorit nga Departamenti i Krimeve të Rënda të Prokurorisë Themelore në Prishtinë, është ndaluar një person, për shkak të dyshimit se ka kryer veprat penale “Vrasja në tentativë” dhe “Mbajtja në pronësi, kontroll apo posedim të paautorizuar të armëve”, si dhe ndaj të njëjtit sot, është parashtruar kërkesë për caktimin e masës së paraburgimit në gjyjatën kompetente, konkretisht në Departamentin e Krimeve të Rënda“, thuhet në përgjigje.
Burimet e Sinjalit mbrëmë njoftoi se motivi që çoi në plagosje ishte një ngatërresë banale. Të njëjtat burime njoftuan se ishin fjalët “pse po m’kqyr” që shtynë të dyshuarin t’ia drejtojë armën taksistit.
Gjendja shëndetësore e të plagosurit vazhdon të jetë e rëndë qysh prej mbrëmë, pavarësisht se ai iu nënshtrua një operacioni.
Sinjali publikoi edhe pamje nga vendi i ngjarjes, ku shihet se Policia kishte dalë në vendin e ngjarjes dhe e kishte bllokuar rrugën.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.
