Deputeti i Lidhjes Demokratike të Kosovës, Arben Gashi, ka reaguar në lidhje me pagesat që deputetët kanë marrë për shpenzimet e derivateve për të udhëtuar në Kuvendin e Kosovës. Ai ka thënë se fillimisht nuk ishte në dijeni për këto pagesa të udhëtimeve, shkruan Gazeta Metro.
Gashi përmes një shkrimi në Facebook, nuk e ka mohuar një raportim të tillë por që thotë se në atë kohë Sekretariati i Kuvendit e kishte parë të arsyeshëm një kompensim të tillë për deputetët që udhëtonin.
Ai tutje ka theksuar se nuk ishte në dijeni në atë kohë për këtë kompensim. Dhe se nga mandati i tij i dytë si deputet ka hequr dorë nga ky kompensim, pasi siç ka thënë Gashi jeton në Prishtinë.
Postimi i plotë:
Mandati im si deputet i Kuvendit të Kosovës është i pesti me radhë. Gjatë mandatin tim të parë, kam jetuar në komunën e Pejës. Në atë kohë, për pjesën dërmuese të deputetëve, apo ata që jetonin jashtë kryeqytetit, Sekretariati i Kuvendit të Kosovës kishte vlerësuar se duhet t’iu paguhen shpenzimet e udhëtimit. Thënë të drejtën, asokohe as nuk e dija që na takonte një gjë e tillë, gjë që e kam kuptuar me shumë muaj vonesë.
Mirëpo, nga mandati im i dytë e tutje unë jetoj në Prishtinë. Dhe nga dita ime e parë e mandatit tim të dytë, e kam njoftuar Sekretariatin e Kuvendit të Kosovës që tash e tutje jetoj në kryeqytet dhe se normalisht lirohem nga pagesa e udhëtimit.
Për të qenë edhe më konkret; me vetëdije e ndërgjegje të pastër, në harmoni me normat e etikes, me vullnetin tim të lirë dhe pa presionin e opinionit publik, unë kam njoftuar e kërkuar, si dhe jam liruar nga pagesa e shpenzimeve të udhëtimit që nga dita ime e parë e mandatit tim të dytë – para 10 vitesh, apo që nga koha që unë jetoj në Prishtinë..
