Sot kryeministri i Kosovës, Albin Kurti, ishte në një vizitë në Telekomin e Kosovës, bashkë me ministren e Ekonomisë Artane Rizvanolli dhe atë të Financave, Hekuran Murati, shkruan Gazeta Metro.
Kurti, duke iu drejtuar mediave përmendi edhe ‘çlirimin’ e Telekomit, që sipas tij ndodhi me ardhjen në pushtet të Qeverisë Kurti.
‘’Shumë prej punëtorëve këtu e kanë rimëkëmbur Telekomin e Kosovës pas çlirimit’’, tha ndër të tjera Kurti.
Tutje ai shtoi se kanë për qëllim ta nxjerrin nga kriza Telekomin, dhe ‘’ ta vendosim në binarët e zhvillimit për të mirën e qytetarëve si konsumatorë dhe të shtetit të Kosovës’’.
Kujtojmë se Kurti dhe VV vazhdimisht kanë deklaruar se që nga ardhja e tyre në pushtet ka ndodhur një lloj ‘’çlirimi’’, kështu duke zgjuar reagime e kritika të shumta nga oponentët politikë, të cilët vazhdimisht thanë se çlirimi nuk ka ndodhur me ardhjen e Kurtit në pushtet./gazetametro.net
