Ish-inspektori i përgjithshëm i Agjencisë Kosovare për Inteligjencë, Burim Ramadani, ka komentuar deklaratën e ambasadorit të Amerikës në Kosovë, Jeff Hovenier, ku ka thënë se FBI po ndihmon Kosovën në lidhje me hetimet për sulmin që ndodhi në fund të muajit nëntor në kanalin e Ibër-Lepencit.
Sipas Ramadanit kjo është hera e parë që FBI, sipas informacioneve të tij, i jep ndihmë institucioneve të Kosovës në rastet ku dyshohet se ka gisht Serbia.
“Me sa e di unë është hera e parë që hetuesit e FBI-së iu ndihmojnë institucioneve të Kosovës në rastet ku dyshohet se ka pasur gisht Serbia, apo struktura të caktuara të Serbisë, në krahasim me rastin e njohur të Banjskës, ku personalisht mendoj se atëherë do të duhej që Kosova vet të kërkonte hetime ndërkombëtare.” – ka deklaruar Ramadani në Klan Kosova.
Ndër të tjera, ai ka thënë se FBI jo vetëm që është njëra prej institucioneve hetuese më të mira në botë, por ekspertiza e saj dhe pajisjet që posedon i hyjnë në ndihmë shumë Kosovës.
“Sulmi në Ibër-Lepenc ka qenë i ekzektuar prej një grupi profesionistësh,të cilët mund të jenë aktiv në institucionet e sigurisë së Serbisë apo të një shteti tjetër, apo mund të jenë të pensionuar, e punojnë si mercenarë. Në kuptimin profesional, jo vetëm nga ndarja ose dhënies së ekspertizës së FBI që është një prej institucioneve hetuese më të mira në botë, por po ashtu edhe në përdorimin e pajisjeve, por edhe në përdorimin e surveimit edhe ajror edhe të hapësirave të tjera.” – ka potencuar Ramadani.
