Kreu i PBDNJ-së, Vangjel Dule, ka bërë akuza të rënda ndaj kandidatit socialist për kryebashkiak të Himarës, Vangjel Tavo. Në një prononcim për mediat, Dule ka deklaruar se Tavo ka shtuar në mënyrë të paligjshme 311 votues të rinj në listat zgjedhore.
Dule tha: “Dua t’ju falënderoj për mundin dhe sakrificën tuaj në kushte të vështira klimaterike. Ky është procesi më absurd i mundshëm, mbështetur në një dekret presidencial që ne e kemi ankimuar dhe për të cilin nuk ka një vendim të formës së prerë në lidhje me kushtetutshmërinë e tij. Himara nesër do të ngrihet me dy kryebashkiakë të zgjedhur, pasi mandati i Belerit nuk është i ndërprerë konform ligjit dhe vendimit të formës së prerë për të gjykuar ankimin në KAS.”
Dule theksoi se gjatë fushatës, Tavo ka pohuar se ka transferuar gjendjen civile të disa qytetarëve të cilët nuk janë banorë të Himarës me qëllim që të mbrojë votën e tij. Ai ka ngritur dyshime për shtimin artificiale të listave të votuesve, duke theksuar se lista e zgjedhësve është rritur me 311 individë krahasuar me listat e majit 2023, dhe ka denoncuar këtë si një shkelje flagrante në SPAK.
Dule e përfundoi duke thënë se Tavo ka shpërndarë mbi 1200 tituj pronësie dhe ka ende 600 të tjerë për t’u shpërndarë, duke kritikuar mungesën e reagimit nga SPAK.
