Ministrja e Drejtësisë, Albulena Haxhiu, ka reaguar me rastin e shënimit të 29-vjetorit të gjenocidit në Srebrenicë, duke thënë se kjo është një shenjë e pashlyer në historinë e popujve të Evropës.
Përmes një postimi në rrjetin social Facebook, Osmani ka thënë se narrativat fashiste, urrejtja, gënjeshtrat dhe frymëzimi armiqësorë ndaj fqinjëve mund të çojnë në tragjedi të përmasave kaq të mëdha
“Sot, përulemi me respekt të thellë përpara kujtimit të viktimave të gjenocidit në Srebrenicë.
Ky akt gjenocidi i kryer me brutalitet të papërshkrueshëm, është një shenjë e pashlyer në historinë e popujve të evropës, një plagë e pa mbyllur që na bënë më të vëmendshëm edhe për mënyrat në të cilat ideologjitë destruktive mund të çojnë në katastrofa të tilla. Narrativat fashiste, urrejtja, gënjeshtrat dhe frymëzimi armiqësorë ndaj fqinjëve mund të çojnë në tragjedi të përmasave kaq të mëdha”, shkroi ajo.
Ministrja Haxhiu është shprehur se janë të freskëta krimet e tmerrshme të Serbisë ndaj fqinjëve të vet, duke thënë që jo se nuk është penduar, por as nuk janë ndryshuar pozicionet dhe narrativat nga regjimi i Millosheviqit.
Sipas saj, bota nuk mund të jetë indiferente ndaj sjelljeve të tilla, sepse nuk duhet të lejojë një klimë të përshtatshme për përsëritje të historisë.
“Janë ende të freskëta krimet e tmerrshme që Serbia kreu ndaj fqinjëve të vet, përfshirë edhe krimet mizore ndaj popullit të Kosovës, për asnjërën nga të cilat nuk pendohet. Madje nuk janë të ndryshme pozicionet dhe narrativat e pushtetit në Serbi, nga regjimi i Millosheviçit.
Bota nuk mund të jetë indiferente ndaj sjelljeve të tilla, sepse nuk duhet të lejojë një klimë të përshtatshme për përsëritje të historisë. Ajo duhet të shërbejë si një thirrje për të gjithë ne, një thirrje për të reflektuar mbi përgjegjësitë tona si qytetarë globalë.
Ne përkujtojmë gjithashtu se këto masakra nuk janë thjesht pasojë e individëve të veçantë të despotik, por shpesh rrjedhin nga struktura të tëra politike dhe sociale që i mbështesin dhe i legjitimojnë ato. Bota demokratike duhet të luftojë kundër këtyre strukturave, duke kërkuar një transformim radikal që synon drejtësi dhe barazi për të gjithë.
Për t’i nderuar viktimat e Srebrenicës, duhet të luftojmë kundër çdo forme të diskriminimit dhe dhunës, dhe të punojmë për paqe dhe drejtësi për të gjithë njerëzit, pavarësisht nga etnia, feja, kombësia, apo çfarëdo përkatësie tjetër”, shkroi më tej Haxhiu.
Në Srebrenicë dhe zonat përreth, forcat serbe të Bosnjës vranë më shumë se 8.300 boshnjakë në korrik të vitit 1995.
