Ministri i Administrimit të Pushtetit Lokal, Elbert Krasniqi përmes një postimi të bërë në Facebook, ka thënë se edhe dy ditë bëhen një vit nga procesi zgjedhor për kryetarët e komunave në veri, dhe siç thotë ai ani pse patën shtyrë dy herë afatin, Lista Serbe atë kohë me urdhër të Beogradit nuk mori pjesë në zgjedhje, shkruan Reporteri.net.
Për t’i dhënë mundësi vendosjes demokratike, Ministri Krasniqi thotë se Kosova nxori udhëzimin administrativ, që komunat në veri të kenë proces demokratik përmes përcaktimit qytetar.
Edhe 2 ditë bëhet 1 vit nga procesi zgjedhor për kryetarët e komunave në 4 komunat në veri të Republikës së Kosovës. 2 herë e patëm shtyrë afatin e zgjedhjeve vetëm për t’i dhënë mundësi të gjithëve. Me urdhër të Beogradit asokohe Lista serbe nuk mori pjesë në zgjedhje dhe në komuna u vendosën kryetarët legal që janë edhe sot.
Për t’i dhënë mundësi vendosjes demokratike Republika e Kosovës nxori udhëzimin administrativ si mundësi që komunat në veri dhe jo vetëm të shkaktojnë proces demokratik zgjedhor përmes përcaktimit qytetar”, ka shkruar Krasniqi në Facebook.
Sipas Krasniqi, lidhur me votimin sot që po zhvillohet, është evidente që Lista Serbe dhe Beogradi kanë dhënë urdhër për bojkotim pasi sipas tij nuk duan të përballen me dështimin eventual të tyre.
“Në përputhje me këtë sot në veri të vendit, pas peticionit të sukseshëm, po mbahet votimi që do të çonte ose jo në zgjedhje komunat përkatëse. Është evidente që Lista serbe dhe Beogradi kanë dhënë urdhër për bojkotim, dhe jo sepse ata nuk duan zgjedhje, por se nuk duan të përballen me dështimin eventual të tyre.
Por, për institucionet e vendit më e rëndësishme se kjo është obligimi që kemi marrë për të krijuar infrastrukturën dhe mundësinë që qyetarët të shprehin në mënyrë demokratike vullnetin e tyre duke përmbushur kështu edhe një zotim të dhënë edhe karshi qyetarëve edhe faktorit ndërkombëtar për krijimin e rrethanave për zgjedhje të reja atje. Është në duar të qyetarëve atje që të shfrytëzojnë këtë mundësi, ndërkohë që është rendi që secila masë e padrejtë mbi Kosovën të hiqet përfundimisht”, ka shkruar Ministri Elbert Krasniqi.