Zyra e Rregullatorit për Energji (ZRRE) ka konfirmuar për KosovaPress, se nuk do të ketë rritje të çmimit të energjisë elektrike. Në një përgjigje me shkrim, ata thonë se në vlerësimin e kostove me shumicë për vitin 2024, ZRRE ka marrë në konsideratë çmimet aktuale, pasi siç thonë “nuk kanë pranuar ndonjë dëshmi tjetër nga palët të cilat i nënshtrohen rregullimit për rishikimin e çmimit të blerjeve të energjisë nga KEK-u, andaj nuk do të ketë ndryshim të çmimeve”.
Megjithatë, njohës të ekonomisë kanë ngritur shqetësimin e tyre në rast se do të ndodhte kjo rritje. Sipas tyre, me shtrenjtimin e tarifave të energjisë elektrike, do të shtrenjtohen edhe produktet e konsumit, e po ashtu do të vështirësohet jeta e qytetarëve dhe të bërit biznes.
Bordi i Zyrës së Rregullatorit për Energji (ZRRE) në mbledhjen e tij të dytë (II) për këtë vit, të mbajtur, më 22 mars 2024, ka miratuar të Hyrat e Lejuara Maksimale (MAR) të operatorëve të Transmetimit/Tregut (KOSTT), Shpërndarjes (KEDS) dhe Furnizuesit me Shërbim Universal (KESCO). Vlera e përgjithshme e miratuar e THL-së për periudhën rregullative prill 2024 - mars 2025 është vendosur të jetë 399.62 milionë euro. Sipas vendimit, bordi ka kërkuar nga operatorët që bazuar në të hyrat e lejuara, të dorëzojnë sa më shpejt që është e mundur kërkesat për tarifat e reja, të cilat do të miratohen në seancën e ardhshme të bordit. Siç përshkruhet në raportet tashme të publikuara, ZRRE nuk ka pranuar ndonjë dëshmi tjetër nga palët të cilat i nënshtrohen rregullimit për rishikimin e çmimit të blerjeve të energjisë nga KEK-u, prandaj në vlerësimin e kostove me shumicë për vitin 2024, ZRRE ka marrë në konsideratë çmimet aktuale”, thuhet në përgjigjen me shkrim nga ZRRE.
Drejtoresha e Dhomës së Tregtisë dhe Industrisë Kosovë, Zana Beqiri konsideron se rritja e çmimit të energjisë do të pasonte me rritje të faturave që paguajnë qytetarët. Sipas saj, çdo rritje e çmimit të energjisë elektrike, do të ndikojë në koston e bizneseve.
Beqiri derisa vlerëson se çmimi i energjisë nuk duhet të ngritët, thotë se përderisa Kosova vazhdon të jetë nën sanksione, vendi po humb edhe me fonde ndërkombëtare, pasi siç thotë ajo, nuk kanë mundësi të kenë qasje.
Se nuk duhet të rritet çmimi i tarifave të energjisë elektrike, e thotë edhe njohësi për çështje të ekonomisë, Mustafë Kadriaj. Sipas tij, vazhdimisht është duke u renduar jeta e qytetarëve, e po ashtu edhe të bërit biznes. Kadriaj, po ashtu akuzon qeverinë për mungesë të politikave të mirëfillta në zhvillimin ekonomik të vendit.
KosovaPress ka dërguar pyetje edhe tek Korporata Energjetike e Kosovës (KEK) lidhur me kërkesën e tyre për shtrenjtim të energjisë elektrike, për çmimin dhe arsyejet e kësaj kërkese, mirëpo të njëjtit nuk kanë kthyer përgjigje deri në publikimin e kësaj teme.Kujtojmë se çmimet e energjisë elektrike në botë kanë nisur të rriten me të madhe në fillim të vitit 2022, kur Rusia ka nisur pushtimin e Ukrainës, për çfarë nisi edhe inflacioni të rritet me shpejtësi.
