Deputetja e Lëvizjes Vetëvendosje, Arbëreshë Kryeziu – Hyseni, ka reaguar lidhur me djegien e dyqanit së nënkryetares së Zveqanit, Natasha Tomaniq.
Kryeziu – Hyseni, përmes një postimi në platformën X, ka thënë se për këtë çështje Beogradi nuk shqetësohet dhe se sipas saj, prandaj nuk ka reagim as nga ndërkombëtarët.
“Dyqani i Natasha Tomanic është djegur dje. Ajo është nënkryetare e komunës së Zveçanit – një serbe kosovare me poste publike. Beogradi duket se nuk shqetësohet, prandaj as komuniteti ndërkombëtar. A është kështu @USAmbKosovo @GermanAmbKOS @EUAmbKS @Olivier_Guerot?”, ka shkruar ajo.
Sot Lista Serbe ka dënuar “insinuatat dhe akuzat e rreme” ndaj këtij subjekti politik lidhur me djegien e lokalit të nënkryetares së Zveçanit, Natasha Tomaniq më 8 mars.
Lista Serbe hodhi dyshime për motivin e zjarrit në lokalin në pronësi të Tomaniqit, duke thënë se ka paralajmërime se në atë vend do të ndërtohet një lokal edhe më i madh “me njerëzit nga jugu dhe me paratë e Prishtinës, pa leje, dhe kushedi se për çfarë qëllimi dhe për këtë Lista Serbe fajësohet politikisht”.
Tomaniq ka akuzuar Listën Serbe lidhur me djegien e dyqanit.
Ajo, për Dukagjinin, ka deklaruar se dyshon që motivi i zjarrvënies është se ajo ka ndihmuar serbët në veri të Kosovës të punësohen në institucionet e Kosovës.
Pamje nga lokali i djegur i nënkryetares së Zveçanit, 8 mars 2024.
Nënkryetarja e Zveçanit ka theksuar se aktivitetet e saj “nuk përshtaten” me Listën Serbe.
Ndërkaq, kryeministri i Kosovës, Albin Kurti, akuzoi “elementet kriminale” në Zveçan për këtë ngjarje.
“Ky duket të jetë ‘urimi’ i tyre për 8 Mars për nënkryetaren Tomaniq dhe për të gjithë serbët që duan integrimin në Kosovë, çlirimin nga strukura kriminale që kërcënojnë dhe pavarësimin nga Beogradi zyrtar që i shantazhon”, ka shkruar Kurti.
