“Festoni me zemër, me dashuri e ngrohtësi me ata që i keni pranë dhe jo me armë që të rrezikoni jetën e tyre”.
Ky është mesazhi që ministri i Punëve të Brendshme, Xhelal Sveçla, u ka dhënë qytetarëve të Kosovës në prag të ndërrimit të motmoteve.
Sveçla bashkë me presidenten Vjosa Osmani, kanë vizituar të premten Policinë e Kosovës dhe Brigadën e Zjarrfikësve në Prishtinë.
“Gjej rastin të falënderoj të gjithë zyrtarët policor, zjarrfikësit, zyrtarët e të gjitha institucioneve të Republikës së Kosovës për punën dhe angazhimin e tyre përgjatë gjithë këtij viti”, ka shkruar ai në Facebook.
“Bashkë do të vazhdojmë punën edhe më intensivisht por më i rëndësishmi mbetet shëndeti juaj dhe i gjithë qytetarëve tanë. Ne po përballemi me variant të ri të virusit Covid-19 andaj ju lutem për kujdes ndaj vetes, të afërmve tuaj dhe qytetarëve tanë”.
“Apeloj për kujdes maksimal në natën e sotme të ndërrimit të motmotit. Festoni me zemër, me dashuri e ngrohtësi me ata që i keni pranë dhe jo me armë që të rrezikoni jetën e tyre. Uroj për një vit të shëndetshëm, të suksesshëm e prosperues për të gjithë ju”./SHQIP.com
