Roja i shkollës "Qamil Guranjaku" në Elbasan është goditur me grushte nga një 40-vjeçar. Durim Koçi i ka kërkuar llogari rojes pse nuk i ka lejuar gruan brenda shkollës, por roja i është përgjigjur se nuk lejohet gjatë orës së mësimit. Pastaj siç shihet edhe në një video të JOQ, 40-vjeçari godet me grushte rojen.
Policia pasi mori kallëzimin nga i moshuari që u dhunua, shoqëroi agresorin në polici, por e liroi duke e konsideruar dhunën ndaj 70-vjeçarit si “një shuplakë”.
“Specialistët për Hetimin e Krimeve të Komisariatit të Policisë Elbasan referuan materialet në Prokurori ku nisi procedimi në gjendje të lirë për shtetasin D. K., 40 vjeç, banues në Elbasan, pasi mesditën e djeshme, ka kallëzuar një shtetas 70 vjeç, se gjatë punës si roje e një shkolle 9-vjeçare, shtetasi D. K., për motive të dobëta, e ka goditur me shuplakë, në fytyrë.”- thuhet në njoftimin e policisë./K.C/dritare.net
