Ish-ambasadorja e SHBA-ve, Yuri Kim rikthehet në Tiranë afro 8 muaj pas largimit nga Shqipëria pasi përfundoi misionin diplomatik. Por këtë herë Kim erdhi si zv. Ndihmës Sekretare e Shtetit, për Çështjet e Evropës dhe Euroazisë në Departamentin Amerikan të Shtetit.
Zyrtarja e lartë e SHBA-ve, Kim ka shoqëruar Sekretarin Amerikan të Shtetit, Antony Blinken, në vizitën e tij të parë në Shqipëri. Diplomati amerikan u prit paraditen e sotme nga Ministri i Punëve të Jashtme, Igli Hasani dhe delgacioni shqiptar në Rinas.
Por çfarë mesazhesh dha Yuri Kim para se të largohej nga vendi ynë?
Zyrtarja vuri në dukje lidhjen e ngushtë me vendin tonë gjatë misionit të këtyre 3 viteve, ku shprehu mirënjohje e saj për traditën, historinë e kulturën shqiptare.
Kim u ndal dhe tek reforma në drejtësi, ku theksoi se do duhet të ketë ende reforma strikte për luftimin e korrupsionit, si dhe lehtësimin e procedurave për të drejtën e pronës.
Duke qenë një nga ambasadoret që ka treguar haptazi mbështetjen për reformën në drejtësi, Kim përcolli disa meszhe të qarta ndaj ish-kryeministrit Sali Berisha, i shpallur "non grata" në SHBA.
Rkthejmë në vëmendje këtu intervistën e Yuri Kim për Zërin e Amerikës, në prill të 2023, para zgjedhjeve vendore të 14 majit, e cila iu drejtua shqiptarëve duke thënë se nuk duhet të votojnë personat e shpallur 'Non Grata', pasi ata nuk mund të jetë përfaqësuesit e shqiptarëve.
"Është një gjë e gabuar. Është e gabuar. Në mendimin objektiv dhe të mirëmenduar të Sheteteve të Bashkuara të Amerikës, personat të cilët janë të përcaktuar, nuk duhet të jenë përfaqësues të popullit shqiptar. Populli shqiptar meriton më mirë dhe kërkon më mirë. Me këtë ka të bëjë demokracia, me këtë ka të bëjë edhe reforma në drejtësi.
Dhe mendoj se kur ke njerëz të përcaktuar nga Shtetet e Bashkuara të Amerikës për korrupsion domethënës, kur këta individë pretendojnë që do të largojnë korrupsionin, është njësoj si zjarrvënësi i fshatit që premton se do shuajë të gjitha zjarret; madje jo vetëm kaq, por kërkon edhe të gjitha shkrepset që mund të gjejë nga të gjithë fshatarët e tjerë.
Është thjesht e gabuar, e gabuar. Dhe mendoj se qytetarët e zakonshëm shqiptarë janë të zgjuar dhe e dinë se kjo nuk ka logjikë. Mendoj se qytetarët shqiptarë meritojnë më mirë dhe më shumë se aq; Shtetet e Bashkuara të Amerikës besojnë se Shqipëria meriton dhe duhet të jetë më mirë.", deklaroi Kim në intervistë në prill 2023.
Por është një rastësi apo ironi e fatit, vizita e Antony Blinken në Tiranë, në një kohë kur Berisha, të cilin vetë zyrtari e shpalli "non grata", tashmë ndodhet në "arrest shtëpie", i akuzuar për korrupsion pasiv për aferën "Partizani".
Ndërkohë Berisha, i cili ndodhet në izolim reagoi për vizitën e zyrtarit të lartë, Antony Blinken, duke thënë se do ketë takime vetëm me partinë-shtet, ndërsa akuzoi sërish kryeministrin Edi Rama, i cili sipas tij ka ndikuar në shpalljen "non grata" të Berishës. Përgatiti A.Mënalla/ Liberale
