Ministri i Financave, Hekuran Murati, i ka reaguar kryetares së Gjykatës Kushtetuese, Gresa Caka-Nimani, duke i thënë se ka “cektësi të njohurive për konceptin e ekonomisë së tregut të lirë”.
Murati përmes një postimi në Facebook ka thënë se kryetarja Caka -Nimanit gjatë një interviste kishte përmendur togfjalëshin “ekonomia e lirë e tregut”, më shumë se njëherë.
Sipas Muratit po rezulton se as kryetarja e Gjykatës Kushtetuese nuk po e kupton këtë. Madje ai tha se “pasojat e bllokimit të këtij ligji po i vuajnë qytetarët”.
Dua të besoj që fjalën e ka pasur për konceptin e “ekonomisë së tregut të lirë” apo “free market economy” në anglisht. Kur e mendon që ka edhe ekonomistë në LDK që e bëjnë gabimin e njëjtë, nuk mund ta gjykosh edhe aq rëndë një shkarje të tillë të zonjës Caka e cila me profesion është juriste. Mirëpo për funksionin që ushtron, një cektësi e tillë e njohurive për këtë koncept ekonomik, pra “ekonominë e tregut të lirë”, rrezikon të prodhojë vendimmarrje të gabuar që ka pasoja të mëdha për qytetarët”, ka shkruar Murati.
Tutje ai ka thënë se ligje e mekanizma të ngjashme kanë të gjitha shtetet e BE , por sipas tij Gjykata Kushtetuese e Kosovës nuk ka as njohuritë bazike mbi konceptet e ekonomisë së lirë të tregut.
Megjithatë, Gjykata Kushtetuese e Kosovës, që me sa shihet nuk ka as njohuritë bazike mbi koncepte të tilla, kishte vendosur ta rrëzojë Ligjin për Çmime Tavan, në emër të mbrojtjes së “ekonomisë së lirë të tregut”. Pasojat e këtij vendimi, qytetarët e Republikës vazhdojnë t’i vuajnë edhe sot”, ka thënë ndër të tjera Murati.
