Ministri i Brendshëm i Shqipërisë, Taulant Balla, tha se ka komunikuar me homologun e tij, Danillo Saranoviq, të cilit i ka kërkuar informacion për ngjarjen e rëndë që ka ndodhur në Mal të Zi, ku tre të rinj shqiptarë janë rrahur brutalisht nga një grup personash.
Balla në një reagim për mediat tha se tre shtetasit shqiptarë janë sulmuar nga tetë persona të veshur me uniforma ushtarake.
Ai falënderoi kryeministrin e Malit të Zi, Millojko Spajiq, i cili në një postim në rrjetet sociale shprehu keqardhjen për ngjarjen dhe bëri të ditur se një prej autorëve është identifikuar dhe po punohet për kapjen e tij dhe zbardhjen e plotë të ngjarjes.
Ministria e Punëve të Jashtme e Shqipërisë tha se Ambasada shqiptare në Mal të Zi është duke ndjekur nga afër të gjitha zhvillimet rreth kësaj ngjarjeje, ndërsa tre shtetasit shqiptarë janë marrë në mbrojtje dhe u është ofruar çdo shërbim i nevojshëm, përfshirë dhe ai ligjor.
