Ngjarja që ndodhi në Kosovë ku u vra Liridona Ademja tronditi tërë opinionin publik. Organizator i këtij krimi, sipas policisë së Kosovës, është Naim Murseli, bashkëshorti i 30-vjeçares.
Mediat raportojnë se ai ka qenë ish-këshilltar i Behgjet Pacollit. Mirëpo avokati Tomë Gashi në një lidhje live për Klan News me gazetarin Besard Jacaj tha se nuk e ka takuar asnjëherë Naim Murselin gjatë kohës kur vetë avokati punonte si këshilltar i Hashim Thaçit, asokohe kryeministër i Kosovës.
Sipas Gashit, Murseli duket se ka qenë imponues dhe ka pasur mani që të ketë foto me njerëz të famshëm dhe të pushtetshëm.
Tom Gashi: Në kohën kur zoti Naim Murseli tani është bërë publike se ka qenë këshilltar i zotit Behgjet Pacolli unë kam qenë këshilltar i kryeministrit të atëhershëm, zotit Hashim Thaçi. Mirëpo ja që kurrë nuk e kam takuar dhe këtë person nuk e kam parë ndonjëherë në jetë. Për këtë arsye ndoshta ka qenë sipas informatave që po rrjedhin, ka qenë jashtëzakonisht imponues, do të thotë që të ketë fotografi me persona udhëheqës politikë dhe të tjerë, dhe ndoshta me persona VIP, por jo që ta kem parë ndonjëherë. Atë që unë besoj që nuk i bën nder askujt nuk duhet që të lidhim punën e tij të këshilltarit të zotit Pacolli me veprimet e zotit Murseli në atë kohë apo tani. Ne e dimë që Kosova është e vogël dhe secili ka mundësi të bëjë fotografi edhe me Presidentin, edhe me Presidenten. Edhe me kryeministrin, edhe me zyrtarë të tjerë, por duket që të ketë pasur një mani zoti Murseli që të ketë fotografi me njerëz të famshëm të pushtetshëm dhe që këto ti bëjë publike./tvklan.al
