Një rast jo fort i zakonshëm i vjedhjes ka ndodhur në një banesë në kryeqytet. Hajni këtë herë nuk u maskua, e as nuk u fsheh, por kreu vjedhjen si në filma. Burimet e Sinjalit brenda Prokurorisë në Prishtinë kanë dhënë detaje se si ndodhi ngjarja, në pikë të ditës, në rrugën “Tirana”.
“Punëtori i Ujësjellësit” i doli hajn 62-vjeçares
Gjithë ngjarja ndodhi kur një person i dyshuar iu paraqit të moshuarës te dera, duke u prezantuar si punëtor i Ujësjellësit. Ai i tha gruas se kishte shkuar te banesa e saj për të shikuar një problem në lidhje me ujin.
E moshuara, duke i besuar “punëtorit” të Ujësjellësit ia hapi derën dhe e ftoi brenda për ta rregulluar shtypjen e ujit. I dyshuari hyri deri te kuzhina dhe filloi “punën” e tij, por i duhej edhe ndihma e 62-vjeçares.
Derisa i dyshuari gjendjen në kuzhinë i tha viktimës që të shkonte deri në banjo që ta ndalte ujin, në mënyrë që ai ta ketë më të lehtë “punën” e tij.
Ato pak minuta hajni i shfrytëzoi. Doli në korridor, mori çantën e krahut të viktimës dhe iku.
Burimet e Sinjalit bënë të ditur se i dyshuari nga çanta e kishte marrë kuletën me një shumë të të hollave, ndërsa çantën e kishte lënë në shkallët e banesës.
