Kryeministri i Kosovës, Albin Kurti, ka mbërritur në Bratislavë për Forumin Global të Sigurisë 2023.
Kreu i qeverisë do të merr pjesë në një tryezë diskutimi me temë “E ardhmja e Kosovës”.
Ky është edicioni i 18-të i Forumit të Bratislavës për politikën e jashtme, sigurinë, çështjet evropiane dhe ekonominë.
Vizita e tij atje po ndodh në kohën kur tensionet janë të larta në Veri të Kosovës.
Serbët po kërkojnë largimin e njësiteve speciale dhe dorëheqjen e kryetarëve shqiptarë të sapozgjedhur në komunat veriore, të banuara kryesisht me ta. Serbët gjatë protestave që po i bëjnë që katër ditë radhazi u përleshën me trupat e KFOR-it dhe përveç 30 ushtarëve të lënduar të hënën, është raportuar edhe për dhjetëra të lënduar nga ana e protestuesve.
Amerika do që Kosova t`i heq specialët nga atje dhe që kryetarët të ushtrojnë detyrën përtej objekteve komunale. Kryeministri Albin Kurti është kategorik kundër. Për pasojë situata në Veri është tepër e tensionuar. E Amerika i ka vënë madje sanksione Kosovës, duke e përjashtuar nga stërvitja ushtarake “Defender Europe 2023”.
Burime të REL brenda Bashkimit Evropian e përmendën të martën Bratisllavën si vendtakim të mundshëm të Kurtit me presidentin e Serbisë, Aleksandar Vuçiq, dhe thanë se janë duke punuar në këtë drejtim.
Të dy liderët ishin të ftuar në forumin e sigursië. Nga Qeveria e Kurtit thanë fillimisht se kryeministri e ka shtyrë pjesëmarrjen, për shkak të zhvillimeve në veri të Kosovës.
Vuçiq, megjithatë, tha se nuk do të shkojë në Bratisllavë, sepse, siç u shpreh, “është më e rëndësishme të jem me popullin tim”.
REL-i po përpiqet të marrë informacione nga zyrtarët evropianë nëse takimi Kurti-Vuçiq në Bratisllavë ka ende gjasa.
