Presidentja e Kosovës, Vjosa Osmani, është takuar sot me të dërguarin e posaçëm të Gjermanisë për Ballkanin Perëndimor, Manuel Sarrazin.
Ajo aty ka përsëritur se veprimet e Policisë në veri janë legjitime ndaj strukturave e grupeve kriminale të presidentit serb Aleksandar Vuçiq, por ka përmendur edhe koordinimin me aleatët ndërkombëtarë.
Sipas njoftimit të Presidencës, Osmani ka thënë se Kosova mbetet e përkushtuar ndaj vlerave evropiane të funksionimit si shtet.
Osmani ka përsëritur se veprimet e Policisë së Kosovës ndaj strukturave ilegale e grupeve kriminale të Vuçiqit janë legjitime, në realizim të detyrave të tyre kushtetuese dhe në mbrojtje të të gjithë qytetarëve, pa dallim. Kosova mbetet e përkushtuar ndaj vlerave evropiane të funksionimit si shtet qytetar duke ruajtur karakterin multietnik të saj dhe institucioneve të saj”, thuhet në njoftim.
Por Osmani ka theksuar rëndësinë e mbështetjes së aleatëve ndërkombëtarë, të cilët dje dënuar ashpër veprimet e Qeverisë së Kosovës.
“Osmani ka theksuar rëndësinë e mbështetjes së aleatëve ndërkombëtar dhe koordinimit të vazhdueshëm me ta në përpjekje për paqe, siguri dhe stabilitet të qëndrueshëm”, vijon njoftimi.
“Në takim është biseduar për zhvillimet e fundit në veri të Republikës së Kosovës. Presidentja ka theksuar se veprimet kriminale në veri të orkestruara nga struktura ilegale të mbështetura nga Beogradi, kanë për qëllim moslejimin e kryetarëve të ri të komunave në veri të vendit të ushtrojnë detyrat sipas ligjit dhe kushtetutës dhe instrumentalizimin e popullatës lokale serbe për të krijuar vakuum institucional, klimë të përgjithshme frike dhe pasigurie. Pavarësisht këtyre përpjekjeve, Kosova ka ndërmarrë veprime muajt e fundit për të shtensionuar situatën pas dorëheqjes së kryetarëve të komunave në veri të vendit në nëntor te vitit te kaluar dhe proceset demokratike e ligjore kanë vazhduar në përputhje me ligjin dhe Kushtetutën”, ka njoftuar Presidenca.
Osmani edhe dje pati qëndrim të ngjashëm. Ka thënë se veprimet e Policisë në veri janë legjitime, por ka theksuar se duhet koordinimi me aleatët.
