Qeveria gjermane po luan një rol shumë problematik në rastin e Kosovës dhe në vend që të punojë për një zgjidhje të pranueshme për të dyja palët dhe të de-përshkallëzojë situatën, ajo po merr anë dhe po kontribuon në përshkallëzimin e konfliktit, thotë Zaklin Nastiq, në një intervistë për Politikat e së Majtës në Bundestagun Gjerman.
“I bëj thirrje qeverisë gjermane të bëjë një ndryshim rrënjësor në politikën e saj dhe të marrë parasysh interesat e të dyja palëve dhe të punojë për lëshime reciproke”, tha deputetja gjermane.
Sipas saj, Gjermania mban përgjegjësi ndaj Serbisë, sepse qeveria mori pjesë në luftën kundër ish-Jugosllavisë dhe kontribuoi në gjendjen aktuale.
Ajo po ashtu ka theksuar se për momentin çelësi i zgjidhjes së konfliktit qëndron para së gjithash në Prishtinë, ku, vlerëson ajo, po ndodhin shumë probleme.
“Nëse të ashtuquajturat vlera perëndimore, që krijuan këtë shtet artificial, nuk i bëjnë presion të mjaftueshëm Kurtit, ai do të vazhdojë të luajë lojën e tij të politikës nacionaliste”, thotë Nastiq.
Gjatë 28 muajve të qeverisjes së Albin Kurtit në Kosovë, ka pasur më shumë se 320 sulme me motive etnike ndaj serbëve, me lëndime dhe të shtëna, dhe Nastiq thekson se kjo është tronditëse.
“Është veçanërisht shqetësuese që incidente të tilla po ndodhin në zemër të Evropës, por duket se ka raportime minimale dhe veprime të papërshtatshme për të adresuar këtë çështje.” Gjatë vizitave të mia në Shtërpcë dhe Mitrovicë, të gjitha palët më njoftuan se gjendja është përkeqësuar që nga ardhja e Kurtit në pushtet. Arrestimet arbitrare, sulmet e armatosura dhe sulmet ndaj kishave ortodokse po shtohen. Është e paimagjinueshme që njerëzit në mes të Evropës duhet të jetojnë në frikë të madhe dhe ndarje politike. “Perëndimi nuk mund të rrijë më duarkryq derisa siguria e serbëve në Kosovë vazhdon të përkeqësohet”, tha Nastiq. /Lajmi.net/
