Agjencia e Kosovës për Inteligjencë (AKI) ka reaguar pas raportimeve se shefi i saj është denoncuar për shantazh të gjyqtarëve kushtetues.
Në një reagim dërguar mediave, AKI i ka hedhur poshtë dhe i ka cilësuar si të pavërteta pretendimet e artikullit të publikuar në Paparaci me titullin “Shefi i AKI-së denoncohet për shantazh të gjyqtarëve kushtetues”.
“AKI, në bazë të detyrave të përshkruara me ligj, bashkëpunon me të gjitha institucionet në Republikën e Kosovës, përfshirë edhe Gjykatën Kushtetuese. Pretendimet e shkrimit në fjalë, provojnë që të mashtrojnë opinionin publik dhe njëkohësisht të dëmtojnë kredibilitetin e AKI-së”, thuhet në reagim, por ky takim nuk u raportua si i rregullt, por si shantazhues.
Paparaci ka raportuar se ka siguruar një dokument ku thuhet se shefi i inteligjencës i ka dorëzuar një memo kryegjyqtares kushtetuese, Gresa Caka, i cili siç përshkruhet në informatë, përmbante të dhëna për gjyqtarët kushtetues se kinse janë të përfshirë në krim dhe po shantazhohen nga jashtë me qëllim që të merret një vendim për ta rrëzuar presidenten e Kosovës, Vjosa Osmani.
