Ambasadori amerikan në Serbi, Christopher Hill, është shprehur optimist se Marrëveshja e Ohrit do të ketë efekt pozitiv në mbarë Ballkanin Perëndimor.
Ai shpreson se Marrëveshja në Ohër do të shënojë histori.
“Ndoshta është herët për të thënë. Shpresoj se Marrëveshja e Ohrit do të shënohet në histori”, ka thënë Hill gjatë një vizite në Vranjë, shkruan Tanjug.
Kjo për faktin se sipas tij, “nga njëra anë, si një pikë nga e cila filloi normalizimi i marrëdhënieve ndërmjet Beogradit dhe Prishtinës dhe bëri që kufijtë t’i bashkojnë njerëzit, jo t’i ndajnë ata”.
“Gjithashtu, se do të jetë një pikë kthese nga e cila filluam të merremi me çështjet ekonomike në radhë të parë dhe bashkëpunimin ekonomik”, ka shtuar Hill.
Siç ka thënë ai, gjatë dy ditëve të fundit, kur ishte në vizitë në Preshevë e Bujanoc, SHBA-të i qëndrojnë pas marrëveshjes së Ohrit në mes të kryeministrit të Kosovës, Albin Kurti, dhe presidentit të Serbisë, Aleksandër Vuçiq, teksa shton se duan të shohin zbatimin e plotë të saj.
“Duhet thënë se kjo marrëveshje e bart përgjegjësinë te të gjithë ne që të bëjmë përpjekje për ta ndihmuar këtë rajon të forcohet dhe të përparojë përmes zhvillimit ekonomik. Të gjitha vendet dhe banorët e Ballkanit Perëndimor duhet të bëjnë përpjekje për ta afruar rajonin me BE-në përmes bashkëpunimit të ndërsjellë dhe kjo nuk është një detyrë politike, por në radhë të parë ekonomike”.
Kështu ka thënë ai në një konferencë për media gjatë vizitës në Bujanoc.
“Është shumë e rëndësishme që qytetarët duhet të dinë se çfarë po ndodh me marrëveshjen ndërmjet Kosovës dhe Serbisë. SHBA-të janë shumë të interesuara për suksesin e kësaj marrëveshjeje, ne qëndrojmë pas saj dhe duam ta shohim zbatimin e plotë të kësaj marrëveshjeje.
Sipas tij, qëllimi i dialogut është zgjidhja e problemeve midis dy vendeve fqinje.
