Punëtorët e Korporatës Energjetike të Kosovës (KEK) kanë protestuar në Prishtinë javën e kaluar si shenjë pakënaqësie me pagat.
Ata kanë kërkuar rritje të pagës e disa kushte më të mira.
Por deri më sot, punëtorët e kësaj korporate nuk kanë marrë asnjë përgjigje.
Për këtë, ata kanë vendosur që nga data 3 Prill të fillojnë grevën.
Kështu ka thënë për Front Online, Kryetari i Sindikatës së Re Korporata Energjetike e Kosovës, Nexhat Llumnica.
“Jo ne ende nuk kemi marr ndonjë përgjigje përveç komunikimit përmes mediave, ne nuk kemi marr përgjigje as prej stafit menaxhues. Ne kemi deklaruar që prej 3 prillit do të fillojmë me greva me qëllim të realizimit të kërkesave, të ngritjes së pagave ka edhe shumë të tjera, mirëpo ato janë në aspektin ligjor”, tha ai për Front Online.
Krahas rritjes së pagës, ata po kërkojnë edhe pagesën për shujtën ushqimore, rrezikshmërinë në punë, pagesën për punën në vikend sipas Ligjit të Punës, si dhe respektimin e vendimeve të gjykatës po për këtë kërkesë./Front Online/